თბილისის სკოლებისთვის ახალი ინფრასტრუქტურული პროექტი იგეგმება

infrastruqturaევროპის საბჭოს განვითარების ბანკის ფინანსური დახმარებით, თბილისის საჯარო სკოლების რეკონსტრუქცია-გამაგრება და ამ სეგმენტის ინფრასტრუქტურაში ენერგო ეფექტურობის გაზრდა იგეგმება. პროექტთან დაკავშირებული ფინანსური და ტექნიკური დეტალები საქართველოს განათლებისა და მეცნიერების მინისტრმა თამარ სანიკიძემ და ფინანსთა მინისტრის მოადგილემ დავით ლეჟავამ დღეს, ევროპის საბჭოს განვითარების ბანკის მრჩეველებთან ერთად განიხილეს.

პროექტი, რომელიც საქართველოს განათლებისა და მეცნიერების სამინისტრომ შეიმუშავა, მიზნად ისახავს გააუმჯობესოს სასწავლო გარემო და სკოლის მოსწავლეთა უსაფრთხოება, ასევე, მიაღწიოს ენერგოეფექტურობის მნიშვნელოვან გაუმჯობესებას, ხარჯების შემცირების მიზნით.

პროექტის ღირებულება დაახლოებით 22 მილიონ ევროს შეადგენს. საიდანაც: 14 მილიონ ევროს შეღავათიანი სესხის სახით, ევროპის საბჭოს განვითარების ბანკი გამოყოფს, აღმოსავლეთ ევროპის ენერგო ეფექტურობის და გარემოს დაცვითი თანამშრომლობის ფონდიდან (E5P) გრანტის სახით გამოიყო 6 მილიონი ევრო. პროექტით ასევე გათვალისწინებულია ქართული მხარის თანამონაწილეობა არაფულადი ფორმით (2 მილიონი ევრო). მალე საქართველოში ჩამოვა საერთაშორისო კომპანია, რომელიც მოახდენს პროექტის საბოლოო შეფასებას, რის შემდეგაც დაიწყება სკოლების რეაბილიტაციის პროცესი.

დატოვეთ კომენტარი

Leave a Reply

Your email address will not be published. Required fields are marked *